مذكراتى

موضوع: مذكراتى السبت أبريل 10, 2010 11:15 am

بسم الله الرحمن الرحيم

ولا ليمون ولا عسل ولا دواء ولا اى شىء نافع
اتشووووووووووه
مذكراتى Hlp

عذرا هذه عطسه اجباريه تخرج من انفى كل خمس دقائق
ليهنئنى العارفون ببواطن الامور فيما يختص بالبرد وخلافه ويقولون لى
حلوه كده -- كده يبقى البرد بيطلع !!!!
وهاقد مره اسبوع بحاله ولم يطلع
اتشووووووووه
اتشى
مذكراتى 31

وكأنه عفريت لابسنى وليس فيروسا
وهذا يقول لى : اعطسى ماتحبسشى العطسه
ده ف التشاطيب
كح !!!
كح
كح

مذكراتى 31

قال لى احدهم
سيبك من الدوا
البرد عاوز تتكلفتى له كويس بكام بطانيه ولحاف لحد ماتعرقى جامد
عرقتى !!
حتقومى تلاقى نفسك زى الحصان ....
وعملتها
وقعدت طول الليل سابحه ف بحيره م العرق كأنى سمك مشوى ملفوف ف جرايد
ومكانش ناقصنى غير شوية ملح لاتحول كأى سمكايه بورى مفتخره فى لمح البصر
وقممت فى وهن كسمكه مخليه فصصوها ومصمصوها لألقى على نفسى النظره الاخيره متأملا شحوبى وهزالى والهالات السوداء التى تحيط بعينى الغائرتين
ولم تفلح المعرقه فى ان تطلع البرد من جتتى
مذكراتى Dntknw

قالوا لى
شوفى ... البرد عاوز نوم
البرد فعلا علاجه انك تنام
لانك لما بتتحركى بتهيجى الفيروس
انما لو نمتى الفيروس بينام هوه كمان
وكأى دكتوره زى حالاتى استمعت لتلك النظريه واستغربت
ومع ذلك سمعت الكلام
وقررت انى انام حتى يموت الفيروس كمدا ويموت ويشبع موووووووووت
بقالى يومين نايمه
ومع ذلك اخذ الفيروس يصول ويجول ويمرح فى جتتى وعظامى ومناخيرى وحلقى بكل شيطانيه

مذكراتى Hlp

الى ان اتى احدهم وقال لى
انتى مالك عامله ف نفسك كده ليه ؟
ماهو ده اللى مخلى البرد مش عاوز يخرج من جتتك
البرد عاوز اللى يقاومه
قومى وانزلى واتحركى وانسي
انا عندى برد اهوه
علاجه حاجه واحده
مناديل ورق فى جيبك
واديله وقته وهوه هيطلع لوحده
قومى ياشيخه ايه ده ؟؟

قمت وخبطت على صدرى خبطه طرزانيه كأى رياضيه محترفه
ثم قفزت من على السرير وكانى فى حلبة مصارعه مع الفيروس
وشعرت بأن روح الفانله الحمرا وامجاد صالح سليم تسكننى الان
ملعون ابو الرقده
يلا بينا
ف الطريق حيانى نجم الشمس بشعاع ضعيف .. سرعان مااختفى على الفور
وكأن الشمس تقول لى على ماقسم
ليعود الجو غامقاا ملبدا بالغيوم

وجلسنا بداخل احد الكافيهات
مااجمل الحياه
الكل من حولى يعطس ويكح وينف
وانا حابسه نفسى ف البيت
وبدأ الرشح وطلعت المناديل
وصديقتى تهنئنى
مش قلت لك
اهوه ابتدى يطلع اهوه
وفجأه
جاءت الرعشه ... والحراره
وشعرت فعلا ان روحى هيا اللى بتطلع
ولم اشعر بأى شىء بعد ذلك
مذكراتى 26

قال الطبيب الذى افقت على وجوده فالحجره
ازاى ساكتين عليها ؟؟
لازم تاخد مضاد حيوى وفيتامينات و و و و و
وادركت وقتها ان دور البرد اللى عندى هوه اقوى ادوار البرد على الاطلاق فى كتب الطب الحديث
وبدأت المضادات الحيويه تواجه الفيروس بنفسها بعد ان ثبت فشلى ف الصمود امامه
ولكن تلك المضادات للاسف
هدت حيلى انا وماقدرش برضه على الفيروس
بل لازالت العطسه والكحه والرعشه والسخونيه والرشح من الاشياء الروتينيه فى حياتى
بل وصارت سمة من سمات شخصيتى مستسلما لكل وصفات الاصدقاء والاعداء
متناسيا كلية الطب وعلاجاتها
اشرب كل ماينصحوننى به
ولا اعترض على اى شىء
وقد شربت فى اسبوع واحد
لبان دكر مغلى
وشيح
وجنزبيل بالقرفه
وماء ترمس مغلى مع ورق الجوافه والبابونج
وكان كل منهم يقدم لى المشروب المعجزه بمقدمه رائعه عن بركاته واثره المؤكد
ويقول لى
استحمليه بس .. هوه صعب شويه انما هتشربيه وهتروقى على طوووووووول
والان بعد ان استحملت كل سخافات الاصدقاء والاطباء ولم يطلع ذلك الفيروس اللعين
مذكراتى Hlp

هل ارجوكم بأه بألا يتدخل احد بعد ذلك فى مسألة البرد دى ؟
مذكراتى Nunu0000

لانها اصبحت بالنسبه لى مسأله شخصيه
بل وعائليه كمان
محدش له دعوه بيا من دلوقتى
مذكراتى 44

اكل جيلاتى متلج
اخد دش ساخن واطلع ف البلكونه
اشرب .....
محدش له دعوه بيا
مذكراتى Ummmm

ده فيروسى وانا حره فيه
مذكراتى Bud

وهكذا انتهت مذكراتى البردانيه
مع القبائل الفيروسيه
من تحت البطانيه

مذكراتى 31